دوو دیوی لێکچووی جیاواز

 لە قووڵاییمدا منێک لێم دەدوێ، (منێکی قووڵ قووڵ) ئەو (منە زۆر قووڵەی)؛ جگە لە قووڵیەکەی، چەندەها چین تۆزی دەستکردی خۆم و قامچی ڕۆژگاری لەسەر نیشتووە، ئەو (منە قووڵەی) بە چەندەها پەتۆی ترس و دڵەڕاوکێ دامپۆشیوە. بێ ئەوەی ئەو (منە قووڵە) دەنگی لێوە بێت، من هەردەم دەمکوتم کردووە، ئەو (منە قووڵە) پشکۆیەکی ئەوەندە بزێو و  لاسارە، شێوەی ئاکاری گۆمی مەنگی وەرگرتووە، ئەو منە، خاوەن هەزارەها تەما و تاودانە، خاوەن نەستێکی خۆڕاگری ئەودیوی هەستە.

ئەو (منە قووڵە) هەمیشە لە چنینەوەی چرۆی تەمای خۆڕسکدایە، ئەو تەنها هاودەمی منە، وەلێ من هاودەمێکی باشی ئەو نیم، من خواستە خۆڕسکەکانی لەبار دەبەم، ئەو (منە قووڵە) بەردەوام سبەینێیەکی نوێم بۆ ڕایەڵ دەکا، منیش هەر ڕێسەکەی لێ دەکەمەوە بە خوری و دووبارە دەمکوتی دەکەمەوە. ئەو هەر میلۆدیەکانی دەروونم نوێ دەکاتەوە، منیش هەر لە ترسی ئەوەی نەوەك دەنگی (ئەو) بەرزتر بێتەوە، نۆتەکانی خوار دەکەمەوە. ئەو ڕەهەندەکانی ڕزگاریم بۆ دەکێشێ، جێ پێم بۆ دادەنا، من بەو چنگانەی هەرچەند گەورەتر دەبن، خێراتر نەخشەی ڕزگاربوون و جێ پێی گەیشتنی دەکوژێنمەوە، ئەو جار جار خۆی دەکاتە گەردەلوول، دەیەوێ قۆڵبەستەکەم بترازێنێ، شوورای زیندانە خۆکردەکە بڕوخێنێ، دەیەوێ زمانم گۆ بکات، دەیەوێ لەو قووڵاییەوە بێت و خۆیم پێ بناسێنێ، دەیەوێ خۆی و خۆم (من و منە قووڵەکە) باشتر یەکتر بناسین و لەیەک نزیکتر ببینەوە، دەیەوێ، نەك چمکێ لە کراسی خۆی دابدڕیت و وەکو متفەڕك لە سەر سینەمی بدا یا وەکو بازن لە دەستمی بکات، دەیەوێ گڕ لە سەرکوتکردن بەردات، دەیەوێ ببم بەو، ببم بەو(منە قووڵە ڕەسەنە)، وەلێ من هێشتا ئەو نیم، نا، ڕاستتر وایە بڵێم، ئەو دەیەوێ داگیرم بکات، واتە ئەو دەیەوێ لەو داگیرکردنەدا ئازادم بکات و بەو داگیرکردنە ئازادم بکات.

 چۆن داگیرکردن ئازاد کردنە؟ بەڵێ ئەو داگیرکردنە ئازادکردنە، ئەی ئەوە نیە (ئەو)، ئەو هێزەیە ئەگەر داگیرم بکات، ئەگەر من ببمەوە (بەو) یا من و ئەو ببین بە یەك، ئەوسا لەبەر ئەوەی ئەو ناسنامە ڕەسەنەکەی منە، ئەو ناسنامەیەی پێش ئەوەی خڵتە و تۆز و خۆڵی ترس، شەرم و دڵەڕاوکێی لەسەر بنیشێ، ئەو منە قووڵەی بەردەوام دەمکوتم کردبوو، سەرکوێرم کردبوو. لەبەر لاوازی و بێ بڕوایی بە خۆم، خۆم لێی گێل کردبوو، کە داگیری کردم دەبمەوە بە خۆم، دەبمەوە بە (خۆم)ە ڕەسەنەکەم، دەبمەوە بە (منی قووڵ)، ئەوسا ئیدی دەمم گۆ دەکات، گیرفانی ویستەکانم دەکرێنەوە، تەقەڵی ڕازەکان هەڵدەوەشێنەوە، یەکسەر لەبەر خۆری ئاسۆیەکی نوێدا، هەموو ویست و ئاواتەکانم هەڵدەخەم، باڵی حەزەکانم لە توێکڵی ئەستووری بێدەنگیدا ئازاد دەکەم.

 ئەو (منە قووڵە) گڵۆڵەیەكە لە ویست، لە هێز، لە توانا، لە بوێری، لە دەنگ و ڕەتکردنەوە، لە نیگایەکی تیژی بەگژداچوونی ڕێگری و بەربەستە، سوپایەكە لە بڕوا و ڕەوێكە لە هەنگاوی دڵنیایی بەرەو دەرگای دادپەروەریی… ئێستا (منێکی قووڵ قووڵ)ی ڕەسەنی گۆشکراو بە بوێری، توانا و بڕوا، وا من دەئاژوێ، ئێستا (منێكی قووڵ) ئەو خودە زکماك و ڕەسەنەی من، بە دونیای هیوا و بەردەوامی دەناسێنێ، تا ئەژنۆکانی بتوانن بەسەر درزەکانی ڕۆژگاردا باز بدەن.

ئەو (منە قووڵە) کێیە و چیە؟ ئەو لەو قووڵاییەوە، ئەو هێزە بەهێزەیە، ئەو وزە نەبڕاوەیەیە، ئەو (منە قووڵە) ئەو زەمینە خۆڕسکەیە، کە تۆوی ژیانێکی شایستەی تێدا دەچێنرێ، ئەو ژیلەمۆ ئەبەدیەیە، کە ناهێڵێ خەون، ویست و توانای ژن بنبڕ بێ و لەبار بچێ، ئەو هەوێنە خوداییەیە، کە بەو نەبێ، هەبوون نابێ، شوشەی ناسنامەی زکماك ڕوون نابێ، خود، خود خۆی ون نابێ، خود خۆی چیە، خود ئەو ناسنامەیەیە کە لەو قووڵاییەوە دەبێتە ئیمپڕاتۆریەتێکی ئەرێنێ، دەبێتە دەسەڵاتێکی حەڵاڵ، هەردوو ئاوێتەی یەك دەبن.

 (من)  و (منی قووڵ)، یا ئەو و تۆ، یا ئەو و ئەو، هەموومان (منێکی قووڵمان) هەیە، گەر دەمکوت و قۆڵبەست و زیندەچاڵ نەکرێ، دەبێتە کراسی سەوزی ژیان. من یا تۆ یا ئەو، دەچینە بازنەیەك، شەرم لە ویست، لە حەز، لە حەقیقەتی خۆڕسکی مرۆڤ ناکەین، دەبینەوە بەو کائینە ڕاستیەی دەبێ هەبین، کە هەردووکمان، تێکەڵ بە هزر و زمان و ویست بووین، ئیدی دەبین بە خۆمان، دەبین بە خاوەن وزەیەکی لەبن نەهاتووی خودی خۆمان.

 دەزانن چ وزەیەک لەو قووڵاییەوە هەڵدەقوڵێ؟ مەگەر هەر ئەو وزەیە نیە ئیرادە، ئومێد، مەبەست و توانا دەخوڵقێنێ؟ مەگەر هەر ئەو وزەیەی لەو خەرەندی بوونەوە نیە، وا پێشڕەوی دەکاتە (پیشە)ی مرۆڤ، مەگەر هەر ئەو ناسنامە دەمکوتکراوە نیە، کاتێ دێتە هاوار و ئازاد دەبێ، ئیتر تۆ ئازاد دەبی، ئازادی تۆ بە ئازادبوونی ئەو ناسنامەیەیە، بە ئازادبوونی ئەو (منە قووڵەیە)، لێگەڕێ با ناسنامەکەت خۆت بیت، تۆ ئەو (منە قووڵ قووڵەی)، هەمیشە زیندوو و بەهێزە ئەگەر سەرکوت نەکرێ، لێگەڕێ با ئەو (من)ە باڵادەست بێت، کورسی حوکمی پێ بسپێرە، با زادی هزری بوێری پێخورەی بێت و گوێ بۆ فەرمانەکانی ئەو (منە قووڵە) ڕادێرە.